സൌഹൃദം

സൌഹൃദത്തിന്റെ ഇടവഴികളിൽ
ഞെട്ടറ്റുവീണ വാക്കുകൾ
കരയുന്ന കരിയിലകളാവും മുമ്പേ
വിശ്വാസത്തിന്റെ കരിമ്പടത്താൽ 
മൂടിയിട്ടേക്കാം.

മറവിയുടെ ഭാണ്ഡത്തിലിരുന്ന്
തേങ്ങുന്ന ഓർമ്മകളെ
സ്മൃതിയുടെ അഗാധവിസ്മൃതിയിൽ 
അടക്കം ചെയ്തേക്കാം.

ആരുമറിയാതെ പറഞ്ഞ സത്യങ്ങളെ
ആർക്കോ വേണ്ടി കാത്തുസൂക്ഷിക്കാം.

ബന്ധങ്ങളുടെ വെളുത്ത പ്രതലത്തിൽ
ചിരിക്കുന്ന ചോരക്കറ...

കനിവിന്റെ അവസാന തുരുത്തിലും 
കനവിന്റെ അടക്കമില്ലായ്മയിലും
ഇനിയൊന്നും അവശേഷിക്കരുത്. 

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                           ജെ.ജെ                                                                                                   

പ്രാർത്ഥന

പ്രാർത്ഥന;

          ഒരു മെഴുകുതിരി നീളത്തിൽ

          മുട്ടുകുത്തി.

പ്രതിജ്ഞ;

          ഒരു മൊബൈൽഫോണിന്റെ

          റിങ് ടോൺ മാതിരി.

കുറുകൽ;

          കാതോടു ചേർന്ന്

          നെഞ്ചോടമർന്ന്

അബദ്ധം;

          ആരോരുമറിയാതെ

          അരുതെന്നുമറിയാതെ

വിലാപം;

          നെഞ്ചത്ത്

          കത്തിച്ച തിരിവച്ച്

          ഇരുട്ട് മായുവോളം.

                                                                                                                                                                                                                                                                                                                                                             ജെ.ജെ

തിരിച്ചറിവുകൾ

മഷിക്കുപ്പിയിൽ

പണ്ടെങ്ങോ കലക്കിയ

സ്വപ്നങ്ങളുടെ ചാരം

പേനയുടെ തുമ്പിൽ

ഇരുട്ടു നിറയ്ക്കുന്നു.

കറുത്ത പുസ്തകത്തിന്റെ

താളു കീറിയെടുത്ത;

പകലിന്റെ പള്ളയിൽ

രാത്രി നിറയുന്നു.

ചോദ്യങ്ങളുടെ നാറ്റമൊഴിഞ്ഞപ്പോൾ

ഒരുത്തരം പോലും

ശരിയാക്കാനായില്ലെന്ന

തിരിച്ചറിവിൽ

കണ്ണു നിറയുന്നു.

വ്യവകലനത്തിന്റെ നൊമ്പരപ്പട്ടിക

എഴുതിപ്പരിചയിച്ച

കണക്കുപുസ്തകത്തിന്റെ താളുകൾ

ഇനി

സ്വപ്നങ്ങളുടെ വെയിൽ‌പ്പരപ്പിൽ

ഉണക്കിസൂക്ഷിക്കാം.

          

 

                                                                                                                                   ജെ.ജെ